कपिलवस्तु, असोज १६ – कपिलवस्तुको चर्चित पर्यटकीय क्षेत्र राजापानिमा पहिलो पटक डोरीको सहायताले पोखरी पार गर्ने साहसिक खेल (पोण्ड क्रस विथ रोप) आयोजना गरिने भएको छ। लायन्स क्लब कपिलवस्तुको आयोजनामा असोज २३ गतेदेखि खेल सुरु हुने जानकारी पत्रकार सम्मेलनमार्फत दिइएको छ।
कार्यक्रम संयोजक राम सुभागे थारुले जानकारी दिए अनुसार, यो खेल बालबालिका (८ देखि १६ वर्ष उमेर समूह) र वयस्क समूह गरी दुई विधामा हुनेछ। प्रतियोगितामा ५० मिटरको दुरीमा तन्काइएको रस्सीमा झुन्डाइएको रिङहरू पार गर्दै बालबालिकाले २५ मिटर र वयस्कहरूले ४८ मिटर पार गर्नुपर्नेछ। सबैभन्दा छिटो यो दुरी पार गर्ने आधारमा विजेता घोषणा गरिनेछ।
लायन्स क्लबका अध्यक्ष नवदत्त घिमिरेले यस खेलबाट सङ्कलित रकम लागू पदार्थ दुव्र्यसनी र अटिजमबाट प्रभावितलाई सहयोग गर्न प्रयोग गरिने बताएका छन्। साथै, यस खेलले नेपालको अन्तर्राष्ट्रिय स्तरमा पहिचान बनाउन सहयोग गर्ने उद्देश्य रहेको छ।
पुरस्कार स्वरूप, बालबालिका तर्फ प्रथम हुनेलाई ११ हजार, दोस्रोलाई ७ हजार, र तेस्रोलाई ५ हजार रुपैयाँ दिइनेछ। वयस्क समूहमा प्रथम हुनेले ५१ हजार १११, दोस्रोले २५ हजार १११, र तेस्रोले १५ हजार १११ रुपैयाँ पाउनेछन्।
