सिन्धुलीमाढी, साउन १८ गते । मध्यपहाडी लोकमार्ग अन्तर्गत सिन्धुलीको फिक्कल गाउँपालिका–२ नवलपुरमा सोमबार बसको ठक्करपछि सडक विभागको कार सुनकोशी नदीमा खस्दा चालकसहित तीन जना बेपत्ता भएका छन्।
जिल्ला प्रहरी कार्यालय सिन्धुलीका अनुसार काठमाडौंबाट ओखलढुङ्गातर्फ जाँदै गरेको बा.प्र.०८–००१ ख ०१४४ नम्बरको बसले बिहान करिब ११ः४५ बजे विपरीत दिशाबाट खोटाङबाट खुर्कोटतर्फ आउँदै गरेको सडक विभाग यान्त्रिक कार्यालय मुलकोट अन्तर्गत मध्यपहाडी लोकमार्गमा प्रयोग भइरहेको नम्बर नखुलेको कारलाई ठक्कर दिएको थियो।
ठक्करपछि कार सडकबाट करिब ५० फिट तल सुनकोशी नदीमा खसेको प्रहरीले जनाएको छ।
बेपत्ता हुनेमा कार चालक सिन्धुपाल्चोकका करिब ३९ वर्षीय दिलकुमार लामा, स्काइभेटर चालक सिन्धुलीको गोलन्जोर गाउँपालिका–१ निवासी धुर्व थापाका करिब २७/२८ वर्षीय छोरा गणेश थापा र नामथर तथा वतन नखुलेका एक जना हेल्पर रहेका छन्।
प्रहरीका अनुसार घटनापछि बस र बस चालक फिक्कल गाउँपालिका–६ निवासी २६ वर्षीय हेमबहादुर तामाङलाई नियन्त्रणमा लिई प्रहरी चौकी खाङसाङमा राखिएको छ।
सुनकोशी नदीमा बाढी आएको र नदीको बहाव तीव्र रहेकाले बेपत्ता कार र व्यक्तिको खोजी तथा उद्धार कार्यमा कठिनाइ भएको प्रहरीले जनाएको छ। नेपाल प्रहरी, सशस्त्र प्रहरी बल र अन्य सुरक्षा निकायको टोली घटनास्थलमा परिचालन भई खोजी तथा उद्धार कार्य जारी राखेको छ।
