नवलपरासी, वैशाख ३ — नारायणघाट–बुटवल सडकखण्डको पूर्वी भाग (गैँडाकोट–दाउन्ने) मा निर्माण गरिने २२ वटै साना पुलको काम सम्पन्न भएको छ। अधिकांश पुलमा सवारीसाधन सञ्चालन भइसकेको छ भने दुई ठूला पुल पनि सञ्चालनमा आएका छन्।
सूचना अधिकारी इन्जिनियर शिव खनालका अनुसार १२ ठूला पुलमध्ये पाँच निर्माण सकिएको र आगामी असारसम्म थप तीन पुल सम्पन्न हुनेछन्। गैँडाकोटको जयश्री, बेल्डिहा, गिरुबारी र अरुणखोला पुलमा ढिलाइ हुने भएको छ, किनभने ती निर्माणका लागि प्रयोग हुने जनशक्ति हाल विनयी खोलाको पुलमा केन्द्रित गरिएको छ।
६५ किलोमिटरको यस खण्डमा ५२.५ किलोमिटर सडक कालोपत्र भइसकेको छ। बाँकी काम वर्षा सुरु हुनु अघि सक्ने लक्ष्यसहित अगाडि बढिरहेको खनालले जानकारी दिनुभयो।
चार लेनमा विस्तार भइरहेको यो सडकको निर्माण कार्य सन् २०१९ मा सुरु भएको थियो। ढिलाइका कारण म्याद तेस्रो पटक थपिएको छ र आगामी असारमा सकिँदैछ।
